Game na sinagot ng Kapuso “it girl" na si Solenn Heussaff ang mga tanong na ibinato sa kanya ng mga host ng GMA News TV's Showbiz Exclusive kabilang na ang paborito niyang suot at posisyon sa pagtulog.
Sa panayam nina Aubrey Carampel at Tim Yap ng Showbiz Exclusive nitong Huwebes, sinabi ni Solenn na mas gusto niyang matawag na “jologs" kaya “socialite."
“Kasi nakaharap sa tv ngayon (kaya maayos ang itsura) pero sa totoong buhay like naka-slippers lang ako, short, t-shirt, tapos game ako sa lahat ," paglalarawan ni Solenn bilang isang “cowboy."
Pagdating sa pagkain, sinabi ng multi-talented Kapuso star na sinigang at corned beef ang kanyang paborito.
Bukod sa pagiging artista at modelo, nagpipinta rin si Solenn, make-up artist, singer, at minsan ding naging bartender.
Ang mahaba raw naman niyang legs ang paborito niyang parte ng kanyang katawan.
“Kasi yung mga tao they think na sobrang tangkad ako. Pero sa totoong buhay, ‘ah maliit ka pala,’ ganun. Five-six (tall) lang ako pero mukha akong matangkad dahil sa legs," paliwanag niya.
Pagdating sa pagtulog, ibinisto ni Solenn na “granny panties" ang paborito niyang suot dahil kumportable siya sa mga walang garter.
At ang paborito niyang posisyon kapag natutulog, natatawa niyang sagot: “Fetus… naka-ballerina parang ganyan (nakataas ang kamay na nakatihaya)."
Sa kanyang pagiging calendar girl ng isang brand ng alak para sa 2012, sinabi ni Solenn na masaya at excited siya dahil very successful ang actress-model na kanyang sinundan na si Anne Curtis. -- FRJimenez, GMA News
source: gmanetwork.com
